Jim Bobs Blog

Ja was macht mer nit alles für neui Sportarta. Und selber mal Sport macha isch au nit schlecht.  Guet Langlauf, hüt im klassischa Stil isch ja gar nit neu: Doch für mich ,
Stefan Schönwetter
und Manuela Disch  scho.

Zum Glück hemer de Profi Maurice Kohler  debi ka.

Ja agfanga hemer nach em Mittag in Klosters Platz, mit Miete vum Gotschna Sport hemer üs usgrüstet und parat gmacht.

Wia funktioniert dia Bindig gnau? De Pizza im ersta Kontakt mit de Langlauf-Ski.

Aller Anfang ist schwer, han recht lang brucht bis ich mal richtig iklipts bin.

D'Manu mit ihra ersta Langlauf-Versüech

Ja au bi mier isch es recht schnell ganga, da isch es grad derab ganga.

Das isch de Maurice in Shooting-Position.

Di beida Stefan wo sich e Pausa gönned, halt jeda uf sini Art.

Au de "Pizza" hets schlussendli im Griff ka...

... aber nit immer ganz so wie er wölla het.

Nit immer liecht ohni Fahrspur derab mit de klassischa Skis z'fahra, da si kai Kante hend. Da gits nur eis: Stemmboga

Schlussendlich hemer doch 10km in 2.5h gschafft ka. Nachher hemer in St. Antönien es wohlverdients Fondue gessa. Isch doch en super Tag gsi.

Ja dia letschta Täg sind recht strub gsi was da i de Ploitik abglofa isch. Ich hetti vu minera Meinig us gseh, gera de Blocher na für witeri 4 Jahr als Bundesrat ka. De Christoph Blocher het i dera Legislatur es paar Fähler gmacht, susch aber hervorragendi Arbet i sim Departement gmacht! Da dörf mer doch nit eifach so eina abwähla. Sini Fähler vu mier us gseh sind, das er sini Meinig trotz em Kollegialitätsprinzip vum Gsamtbundesrat mengisch usagrukct isch. Menigsch muess mer halt als Bundesrat sini Klappa heba und mal nit sini Meinig kundtua. Als National- oder Ständerat hesch es da eifacher.

Mis Herz schlaht au witerhin für de grösst Kanton vu de Schwiz. Darum unterstütz ich no wohnhafta Bündner di neui Bundesrätin Eveline Widmer-Schlumpf. Ihren Maa kenn i flüchtig und si hett als Finanzdirektorin im Kanton Graubünden super gschaffed. Darum hend sich alli BündnerInna gfreut si hüt in Chur und Felsberg begrüssa z'dörfa. Uf de Postautoazeigetaflena isch gstanda:

Willkommen zu Hause, Frau Bundesrätin!

Ja au wenns ganz kurlig gsi isch das Ganze, CVP sei Dank, bini froh das Bündnerland dur e Bundesrätin, Bundeskanzlerin und Ständeratspräsident vertreta isch. So sell sichs au ghöra. Gebed mer doch de neua Bundesrätin Widmer-Schlumpf d'Chance.
Mal luega was d'SVP drus macht? Ihri SVP Graubünden staht hinter ihra neua Bundesrätin und ich als EVP-Mitglied au.
Han gschlossa.

Da di offiziell National League Song vom Daniel Kandlbauer "Power on Ice"

www.beeplog.de/blogfiles/1/1687/general/01poweronicestadionversion.mp3

Viel Spass bim losa