Jim Bobs Blog

Jo wieder mal isch es uf Davos ganga und nit ällei sondern mit em Andy wo mer es paar Täg vorher es SMS us em Unterland gschriba het öb ich wieder mal an en Match ganga. Jo han em gschriba und so isch er ab Zürich mit em Zug mitko. I schafa ja zur Ziit in üsem Hauptsitz in Züri. Ab Landquart simer denn mit mim Auto Richtig Pany gfahra zum d'Lorena und d'Ursina go abhola. Si hend wella uf HCD Style macha, doch insgeheim sinds doch für de ZSC gsi.  Fertig ischs mit de Ruah gsi und ab Davos Wolfgang isch denn mis Auto dur Daniela ganz volla gsi. Es hett natürli scho wieder agfanga schneia, isch au guat isch au Winter. D'Ursina hett gseit es git es früehs Goal. Und tasächlich het de Pascal Müller z'erst Mal i dera Saison trofa. Kurz vor Drittelsendi hett de Michel Riesen im Powerplay trofa.

Nach 26 Min. ich denn au hinder em starka Genoni de Puck ganz liecht drin gsi, doch z'3:1 isch fast postwendend dur üsa Topscorer Alexander Daigle ko. De Stoop hett det mächtig Gas geh.

I de 51. Min. het de Marc Wieser zum ersta Mal i de National League trofa. Gartulation zu dem Treffer!
Postwendend wieder mal de ZSC mit em Treffer dur de Gloor, wo nachher ungestraft dur en Stockschlag an witera Schütz Dario Bügler zum 5:2 Schlussresultat, verbi ko isch.

Nach em Match, i völlig heiser und müed, hemer d'Daniela an Bhf. Davos Dorf bracht und de Lorena ihri Schwöster d'Martina gholt. Mer hend no was warms wella go essa, nachher ich mers zu blöd worda.  Am Bhf. Davos Platz hemer na e hübsch Frau  mit uf küblis gnoh. Det simer na ins Rest. Bahnhöfli Sandwich go essa und na was trinka. Denn e witeri Fahrt nach Pany (vor dem Mond links) und schlussendli sind nur na ich und de Andy gsi. Er het zum 2. Mal dörfa Autofahra, aber zum ersta Mal uf teilw. schneebedeckter enga Strass. So simer spat aber glückli über de Sieg vum HCD in Chur ako.