Jim Bobs Blog

Sa. 22.04.2006

Ja witer gahts au i de 2. Feriawucha. Am Sa. Morga bini am letztschta Temamorga und am letschta Jungschi Namitag gsi. Mer hend no es biz in Zuakunft glueged, was alles no astaht. Am Namitag simer go Velofahra, hend e chli Rundrais gmacht mit Halt zum Brötle und Andacht bi de Seebachscheifena, mer hend recht Glück mit em Wetter kha, am Abig gli isch es denn go Gwittera cho. Bima Jungschärler isch immer de Kettespanner ufako, drum hani denkt er sell mis Velo neh und ich sis. De Spanner isch nur ufako, wenn mer hina gschaltet het und so hani nur vorna gschaltet. Leider isch aber 500m vor Endi Velotour de Spanner ind Speciha ko, drum hets recht tätscht, de Spanner hets def. gschlissa und 3 Speicha bim Hinderrad usgrissa. Am Abig bini nach es paarmal verschieba vo de Ziit her, bini mit em Alex und em Jahn eis uf Gossau SG go trinka, hend chli vom Militär gredt, bin ich doch de einzigg wo scho fertig isch. De Alex het erst im märz agfanga und de Jahn wird Wachmeister, bei sind im Aug. fertig.

So. 23.04.2006

Der grosse Tag. Abschied neh vo de Chrischona Gmeinde Felben-Pfyn, wird als Leiter unter Applaus verbaschieded. Het mi scho möga, eifach so z'gah nach über 15 Jahr. Ich bin da Gross worda und jetzt eifach weg. Weg gahts aber erst am So. 30.4.06. Am Namitag het mer ab em 2 bis am 6 chöna verbi cho, es chlis Abschiedsfestli. Knapp 20 lüt sind denn au cho, merci vielmal isch echt cool gsi das di einta no en rechta Weg uf sich gnoh hend. So hemer de Namitag gnossa, bim Fresspäckli leera  . Am 6i hend denn müessa all gah, will ich in Godi Amriswil han wella. Han aber z'Porgramm spontan gändered, sind nachher ind GVC uf Winti, mit eme Teil Lüt wo bi miar gsi sind. Nachher bin ich und Tabea heigfahra und mit em Zug uf Steg gfahra. Üsi 4 Täg Feria hend grad agfanga.

Mo. 24.04.2006

So chli lang usschlafa, das wers hüt echt, han ja no e Wucha Feria. Sind uf di 11i über Rappi, Arth-Goldau uf Luzern ins IMAX go 2 Film luega. Vo Leua i de Kalahari Wüesti und vo Koralleriff in Australie, sind echt no cooli Film gsi. Sind no am See und i de Altstadt gsi, nachher isch wieder zrugg ganga uf Steg. ich bin denn wieder heiganga, da ich Sache woni für de di. brucht het, vergessa han uf Steg mitneh. So hani e Nacht dihai gschlofa.

Di. 25.04.2006

Chur hets hüt kheissa, doch i bin 1h spöter als plant in Chur, um 12.43 Uhr acho, da i mis Portmonaie dihai vergessa han, das hani erst uf em Weg uf de Bahnhof gmerkt, drum hani au Züg verpasst. Ich han in de WG no mis CD-Regal zemmagsetzt und agfanga no alles irumma. 2h spöter isch au Taby cho. Si het alles chöna aluega, het mer es biz gholfa und am halb 6i simer witer ind Stadt go Buechhandliga go abklappera, Kircha aluega, Glace essa und au go z'Halle- und Freibad go aluega. So isch es scho halb 9ni gsi wo mer wider dihai gsi sind. Mer sind erst am 11i is Bett. Keep Khur.

Mi. 26.04.2006

Hüt simer am 5i ufgstanda uf de erst Bus und de zweit Zug Richtig Züri. genua mer gönd 2 Täg in Europa-Park uf Rust (D). Mer sind nachher in ICE witer uf Freiburg im Breissgau und nachher in Ringsheim acho. Hend e 1/2h uf de Bus gwartet und sind nachher direkt ins Tippidorf ganga, wo mer üses Gepäck hend chöna ablada. Denn ab in Park, bin öppa 4 Jahr nümma det gsi. Es hett nid viel Lüt kha, z'höchst isch 20min astah gsi. So hemer fast uf alli Bahne köna gah, bi de Silver Star hend mini Hend am meista gschwitzt, aber es isch scho e geili Bahn.  Mer hend beschlossa das mer endli ICE AGE 2 gönd go luega, für nur 10 Fr. so simer am 6i zrugg und hend üses Tippi bezoga, isch würkli empfehlenswert 2 Täg det z'bliba. Denn hemer mit era Kinokarte wieder könna in Park ina is Magic Cinema, mit Spezialeffekt hemmer de Film det glueged. So hetts gwindet im Saal, de Stuhl het gwaggeled etc. Nachher simer zrugg und ich han Churer uf em Männer Wäschruum kennaglernt, wo mer nachher no über 1h vor de Tippis gredt hend. Denn isch ab is Bett ganga.

Do. 27.04.2006

De zweit Tag, mer hend chöna bim Tippidorf es Früehstück ineh, sind aber erst am 10.15 Uhr im Park gsi, so hemer es paar Bahne 2 oder 3 mal könna go fahra. Es het wia am Tag vorher nid fest gregnet, aber es het es biz meh Lüt kha, das heisst mer het bi de einta Bahna 5min länger astah müessa. Es isch chli kälter gsi. Mer hend denn no en Rundgang vo 20min gmacht: Treffpunkt Jerusalem, wo de Leidensweg vo Jesus ufzeigt. Leider isch das nur no bis am 21. Mai det, aber isch cool gsi. Es sind scho meh als 5000 Bsuecher das go aluega. Schliesslich simer au no i de Arena gsi, hend so e Gladiator-Show gseh. Isch no cool gsi, aber chli unecht. Leider hemer scho müessa am halb 5i gah, no schnell go s'Gepäck müessa im Tippidorf hola und scho ischs wieder uf de Bus und Zug ganga, wo mer in Steg am 21.30 Uhr acho sind. Das isch üses 1.5 jöhriga Gschenk gsi, ich und Tabea sind sit em 26.10.2004 zemma.

Fr. 28.09.2006

Am Morga hani no es biz usgschlofa, uf di 10.50 Uhr bini uf winti, go Zmittag essa zu mina Grosseltera bevor ich uf Chur gange. Si hend sich mega gfreut, hans au scho lang nüma gseh. Nun us em Mittagessa isch no meh worda, han alti Fotis, Päss, Militärsacha etc. aglueg und viel gredt vo mina Militärziit und das wo na bevorstaht. So bini erst am 18.20 Uhr dihai gsi. Denn bini zum Keven, witer uf Winti, hend aber dur en Fehler viel Ziit verlora. ich bin go tanka, han aber vergessa de Tankdeckel drufzschruba. So hani gseh das de gross Tankdeckel offa isch. Bin uf de Autobahn gsi, sofort bima Parkplatz usa und han gseh das de kli Tankdeckel au fehlt. Naja bin witer gfahr bis zur nöchst Usfahrt und wider zrugg zur Tankstell, wo de Deckel uf de Tanksüla friedlich glega isch. Bin is Outback, no mit em Marco, Christoph und Dave. Am halbi 1 bini au wieder diham gsi.

Sa. 29.04.2006

So hüt am 6i ufstah, am 6.46 Uhr uf de Zug nach Winti. In Frauafeld isch de Keven cho, er het ab det für 30 Fr. könna mitfahra (Mitnahme-GA). So ischs witer in Winti mit em Christoph nach Züri mit de S12 ganga. Nachher mit em ICE nach Basel, woni in 8 Täg nun 3x gsi bin. Ich fahra gern mit em ICE. Nachher simer witer uf Olte-Luzern. Det hemer grossi Plakat gseh: LUGA Armee baut Brücken, das hemer nit wella verpassa. So simer ind Allmend usa, hend 8 / 12 Fr. zahlt, nur weg de Armee. Si hend sich det vorgstellt, am besta hani de Super Puma gfunda. mer hend det mit div. Rekruten und Druchdiener gredt kha. Es isch doch no es Erlebnis gsi, hani chli chöna über de scheiss Verein reda. Hend natürli müessa schöni Fraua anastella, wies u viel Fraua im Militär het.  Drum min Spruch vom Tag: En schiess Verein und doch stönd d'Fraua druf. Denn simer zrugg uf Züri, im Mac go essa. De Christoph isch denn hai ganga, er het müssa de TC in Säntispark tua. Denn simer witar uf Burgdorf, Solothurn uf de Balmberg, wo mer Schnee gseh und gspürt hend. Sind nur 10min det gsi und mit em Bus widar uf Solothurn zrugg. Witar uf Züri und Horge, wo mer zu era Kollegin Eva zum Znacht iglada gsi sind. Hend det ihri 1 Zimmer Whg. gnau aglueged, si hett eba au erst grad zügled uf de 1. April. So bini au erst wieder nach de 12e is Bett cho. Merci Melanie fürs Phona.

So. 30.04.2006

Und jetzt gahts ab uf Chur im spötera Namitag, mit dem woni no da in Eschikofe han...